اولا- الامتحان مش صعب خالص بس عايز طريقة مذاكره ودى الحاجه اللى كلنا تايهين فيها, بمعنى انك تقدر تبتدى من الصفر من ال present simple tense , بجد يعنى لو انت مستواك اقل من المتوسط لو عملت اللى فى البوست ده هتقدر, انا مشيت بالخطوات دى والحمد لله جبت
Overall 6.5 ( 6.5 Listening - 6 Reading - 6.5 Writing- 6.5 Speaking )
نبتدى نقول من الاخر؟ هنعمل ايه ؟ وبالخطوات يعنى نخلص مذاكرة خطوة ندخل اللى بعدها ؟
1- انا ابتديت بالكتاب الرائع الغير عادى ده اللى بيشرح بالعربى للمبتدىء والمتميز, هو بيشرح من اول الحروف والازمنه وتكوين الجمله والسؤال والنفى ونفعنى جدا فى الاسبيكنج والرايتنج وتكوين الجمل فى الجزئين, الكتاب ده مشهور جدا جدا اسمه express English , بصراحه انا شايف انه لازم تذاكره هيفرق معاك حتى لو انت مستواك كويس. تقدر تحمله من هنا
2- خلصت الكتاب اللى فوق ده وبعد كده جبت كتب كامبردج (مش هتحل , لسه شويه: اعرف شكل الامتحان عامل ازاى , انا بصيت بسرعه كده عشان اعرف الامتحان بييجى فيه ايه عشان اعرف اذاكره
ازاى.
3- ابتديت اذاكر ليسنينج: السكشن ده هديه حتى لو انت مسمعتش انجليش كتير قبل كده, ازاى ؟؟
انا رحت جبت الكتب بتاع كامبردج من 6 الى 9 كل كتاب فيه 4 امتحانات, يبقا كده 16 امتحان وطبعت ال Transcripts بتاعتهم, اللى هى عباره عن الليسننج اللى بتسمعه فى كل امتحان بس بيبقا مكتوب فى اخر الكتاب عشان لو مش فاهم من السمع ممكن تقرا الكلام وانت بتسمعه. كل يوم كنت باخد امتحان واسمعه سكشن ورا سكشن وفى كل سكشن كنت بعلم خط تحت الكلمه اللى مش عارفها واترجمها واسمعها واحفظها وانطقها واحطها ف جمله عشان الاسبيكنج برده وبعد م اسمع الامتحان , اسمعه كله تانى من غير قراءه وبعدها احل الامتحان. واليوم اللى بعده بقا بالنهار كنت بسمع الامتحان اللى انا حليته امبارح فى المواصلات بقدر الامكان ( يبقا مهم ان تانى يوم تراجع امتحان امبارح)
أنواع الاسئله وطريقة الحل هتلاقيها هنا على الموقع الرائع ده
4- الريدنج: اللى كرهنى فى الايلتس وفى حياتى, بس اكتشف متأخر انه سهل او مش صعب اوى , بس فهمته متأخر للاسف ولقيت مصدر كويس فىالمذاكر متاخر للاسف عشان كده جبت فيه 6 بس. نصيحه ما تدورش هتذاكر منين بعد اللينك ده, اللينك ده هديه جباره فعلا لو اديتها حقها كانت هتفرق معايا بس الحمد لله
طريقه المذاكره بقا أهم: اسمع الفيديو عن نوع معين من الاسئله بعد كده امسك اكتر من امتحان من بتوع كامبردج من 6 الى9 حل فيه السؤال ده بس وبعد كده حل نفس السؤال من امتحانات تانى, لحد م تتقن السؤال , بلاش تتفرج عليهم كلهم وتحل امتحان كامل هتتوه فعلا وهتنسى طريقه حل السؤال بمجدر انك تبتدى تحل ف التانى, اتقن الاسئله نوع نوع. ( السكشن ده بالذات لازم تحل كتير وتظبط وقت بعد م تتقن انواع الاسئله)
5- الرايتنج: انا شايفه سهل بصراحه بس لازم تعرف طريقه كتابه كل نوع من ال essays وتعرف ال structure بتاع كل واحد , احسن حاجه ذاكرت منها ال writing هو الموقع ده , بصراحه مالوش حل , هتحس انك بتعمل دماغ وتحب الرايتنج وانت بتذاكر منه, شوفه وادع لى
دى انواع ال task 2 وال structure بتاع كل نوع وهتكتب ايه وايمته وفين
خلصت اللى فوق بقا , نروح للموقع الجميل جدا ومن احسن المواقع فى نماذج الكتابه وهو
هات الامثله بتاع كل نوع واقراها كتير واحفظ كلمات عن التعليم مثلا والصحه والرياضه والوزن و......الخ هتلاقى نفسك اتحسنت
6:- الاسبيكنج: انا جبت الموقع بتاع LIZ برده وحفظت منه حاجات كتير , معانى كلمات وجمل وصل استخدمها بين الجمل وهتلاقى نماذج اسئله كتير لكل جزء من اجزاء الاسبيكنج, هات الاسئله وباستخدام الكلمات اللى هتحفظها والكتاب اللى انت ذاكرته فى نقطه رقم1 , هتلاقى نفسك بتعرف تكون جمل صح, بس هتلاقى نفسك بطىء مش مشكله, جاوب بقا الاسئله وهات الموبايل وسجل السؤال والجواب, هتلاقى مع الوقت والتدريب والاسئله بتتغير بس كلها بتتكلم عن نفس الموضوع التعليم الكليه والجامعه والبيت بتاعك وشغلك, سجل كتثير واقرا اسئله واجابتها هتلاقى ثقتك ابتدت تزيد, انا ذاكرته من الموقع ده برده
خلصت بقا كتب 6 و 7 و8 و9 او اللى تقدر عليهم , انا لسه بقا هاجيب سيرة كتاب رقم 10 . ده مش للمذاكره ده عشان تحل ال 4 امتحانات بتوعه وتقيس مستواك بقا عامل ازاى , ولازم تحل الامتحانات دى تحت وقت وظروف الامتحان. بالتوفيق واى حد محتاج منى اى حاجه ممكن يسألنى هنا ف البوست وكلنا نستفيد , ارجو منكم الدعاء دعوه خالصة. شكرا واسف للاطاله.
تعليقات: 0