-->

عصام المجتهد الشاطر الذكي الطفل الراجل



قاعد ع القهوه بعد ماخلصت شغلي بتفرج ع الماتش ولقيت الولد اللي زي العسل دا بيلف ع الناس بيعرض عليهم حاجات بيبيعها ، استنيت لما خلص ورحت قعدت معاه ع طرابيزه بعيد عن الماتش عشان استأذنه اتعرف عليه ، فرح جدا لما حس اني مهتم اني اقعد معاه ، قال لي ان اسمه عصام وعنده 15 سنة ، ولما سألته بتدرس ولا بتشتغل بس ياعم عصام ، بصلي بنظرة فخر كدا وقالي "أنا التالت ع المدرسة ياعمو" ، وهنا عينيا برّقت بصراحه !! ، قال لي ع مدرسته وانه في تالته اعدادي ، وانه بيشتغل عشان يساعد أهله وعشان يقدر يوفر فلوس الدروس اللي بياخدها في المواد الصعبه ، ولما خدت منه عرض شربات من اللي بيبيعها لقيته مهتم جدا انه يقولي لا استنى في الوان تانيه افرجك عليها وفي خامه مش عارف ايه وخامه مش عارف ايه اللي هو بيتقن شغله وبيحبه بجد مش عايز ياخد تمن الحاجه ويمشي وفضل يقنعني واسلوبه والله العظيم منتهى الجمال والأدب والزوق مما يدل ع انه متربي في بيت محترم ، لما لقى ان اللي اديتهوله أكتر من تمن الشربات قال لي لا استنى دا مش تمن الشربات وكان مصر انه يرجعلي الباقي ومياخدوش وبالعافيه فضلت اتحايل عليه عشان يوافق ياخده واني مالحقتش اعزمه ع حاجه وكدا ، لما استأذنته اني اصوره عشان اعرّف الناس عليه كان رده "ياعمو دا شرف ليا طبعا ربنا يخلي حضرتك" ..
عصام بيلف ع القهاوي اللي ع الكورنيش في حلوان ، ودا رقم موبايله للي حابب يساعده بأي طريقه أو يوصله لحد يقدر يساعده ساعدوا عصام ولو حتى بكلمه حلوه ربنا يرضيكم
01554033785
عصام المجتهد الشاطر الذكي الطفل الراجل 


نقلا عن
Islam Akmal

جديد قسم : اخبار