1- موقع edX العظيم ده
تفتحه تلاقي كورسات من أكبر جامعات العالم زي هارفاد وإم آي تي وستانفورد وغيرهم قدامك ببلاش، وامتحانات وتدريبات عملية وجروبات مناقشة وعالم آخر، وممكن كمان تاخد شهادة معتمدة من الجامعة بسعر رمزي.
2- Coursera
بردو كورسات معتمدة من أفضل الجامعات متاحة قدامك بتقولك إدرسني وخلي عندك دم.
.
3- Khan Academy
للرائع سلمان خان الي وصفه بيل جيتس بأنه صاحب أفضل تجربة تعليمية في عصرنا الحديث، الموقع هيبدأ معاك في كل علم تختاره من الصفر وحتى المستوى الجامعي، بأسلوب بسيط وفيديوهات شيقة وبسيطة ولو الإنجلش بتاعك دون المتوسط هتفهمها والكلام مكتوب قدامك، وبعض الكورسات مترجمة بالعربية، وحاجة آخر جمال بجد..
.
4- موقع MIT OpenCourseWare
الواحد لما يلاقي أعظم جامعة في العلوم والتكنولوجيا في العالم تبقى منزلة أغلب كورساتها صوت وصورة من قلب قاعة المحاضرات، بدون تسجيل دخول وبدون ما تدفع مليم، مجرد ضغطة زر وتبدأ الكورس على يد أفضل أساتذة جامعات موجودين، وإحنا نسيف اللينك ونرميه، يبقى قلة أدب!
.
عارف إن مشكلة أغلبنا هتكون مع الإنجلش، ولو إني من الفريق الي بينصح برمي نفسك في البحر عشان تتعلم العوم، وإن الأفضل تعوّد نفسك على الإنجلش لأن المحتوى العربي لا يضاهي الإنجليزي بأي حال، وإنك في أول مرحلة هتكون مش فاهم كلمة وبعدين هتنتقل لمرحلة (أنا سمعت الكلمة دي قبل كده) وتبدأ تألَف المصطلحات وتربطها بالكلام ثم تنتقل لمرحلة فهم مضمون الكلام حتى لو وقع منك كتير، حتى الوصول لمرحلة الفهم الكامل أو شبه الكامل.
ومع ذلك ناخد فكرة بردو عن المنصات العربية الي بتقدم كورسات قيمة مجانا.
===========
5- شمسنا العربية.
من المبادرات الرائعة التي تهدف لترجمة كورسات الجامعات الي فوق دي، وحتى الآن ترجمت مجموعة كورسات متنوعة غاية في الروعة فادخل خد فكرة سواء على موقعها أو على قناتها ع اليوتيوب من هنا أسهل: http://bit.ly/2rJ8Hlr
.
6- إدراك: https://www.edraak.org/
من أشهر المنصات العربية الي بتوفر كورسات متميزة في مختلف المجالات بإشراف من الملكة رانيا العبد الله زوجة ملك الأردن بنفسها.
.
7- رواق: http://bit.ly/28IMVbP
.
8- مهارة: http://bit.ly/2qcRFdq
.
9- قناة أكاديمية التحرير: http://bit.ly/1IrxfC5
.
.
11- قناة جامعة الملك خالد: http://bit.ly/2qcQR8n
.
12- شبكة عبد الله عيد الرائعة الخاصة بعلوم الحاسب: http://bit.ly/2qHTy5g
المواقع دي غيرت حياة ملايين حرفيًا، أعرف ناس مدمناها زي إدماننا للسوشيال ميديا كده، يعني إحنا بنصحى نفتح الفيس في لهفة نشوف مين عمل لايك أو نزل بوست، هم بردو بيفتحوا يشوفوا لو في كورس جديد نزل بنفس اللهفة.
الامتحانات هتخلص والأجازة هتيجي والفراغ هيقتلنا، والكورسات أهي، لو هتسيف وتركنه جنب إخواته لأجل غير مسمى وتقضيها مسلسلات، يبقى بلاش تخدع نفسك بالحجج الفارغة دي تاني يا صديقي.
تعليقات: 0