مجموعه افكار تساعدك علي التغلب علي ملل المواصلات

1. هتاخد في شطنتك كتابين على الأقل، أول ما تركب وتدفع، متشيلش عينك من الكتاب اللي هتبدأ بيه، والكتاب التاني لما تزهق من الاول.

في ناس صحابي خلصوا كتب ومجلدات كاملة في مشوار الكلية. بس أرجووك حاول من الأول تبين اسم الكتاب للي جنبك عشان فضوله هيقتله كل شوية ويعرف بتقرأ إيه وعشان تنشر ثقافة إن الناس تقرأ في المواصلات لما حد يشوفك ممكن يعمل زيك بعد كده، ولو مكسل تقرأ ممكن تسمعه، من أبليكيشن اقرألي مثلا أو غيره من المواقع والتطبيقات.

محتار تقرأ إيه؟، دي قائمة ترشيحات رائعة جدا ومتنوعة وقيمة لـ د. شادي إبدأ بيها.

. 

2. تحفظ القرآن كاملا، أفضل وأسهل طريقة تحفظ بيها القرآن إنك تسمع كتيـر، عن نفسي في الحفظ بحدد سورة معينة وأنزل تلاوتها بصوت العظماء الخمس: عبد الباسط - المنشاوي - مصطفى اسماعيل - الحصري - محمد رفعت وأفضل أكررها حتى يسبق لساني لسان المقرئ.

وممكن تفهم وتحفظ أحاديث الأربعين النووية بالشرح من تطبيق رائع اسمه (الأربعون النووية مع الشرح).

.

3. اللغة ثم اللغة، وقت المواصلات يكفي جدا لإحداث طفرة في مستواك في الإنجلش لو اهتميت واستمريت.

فـ ممكن تسمع قناة راديو بالإنجلش، أو تتابع قنوات يوتيوب ودول مفيش أكتر منهم.

أو تتابع من التطبيقين الرائعين والممتعين دول (Duolingo) و(Memrise).

.

4. تقدر تسمع شعر عربي، للناس الي بتعشقه زيي، ومهتمة بالنطق الصح وبتحب الفصحى ونفسها تتطور فيها،

القناة الرائعة دي هتعيشك جوا عالم الشعر العربي لتتذوق جماله:

وممكن تسمع ابتهالات للنقشبندي أو نصر الدين طوبار، أو معزوفات عالمية ع الساوند كلاود.

.

5. طبعا مش محتاج أقولك تحمل تطبيق (تيد- TED) وتخلص الي تقدر عليه، منها هتستفاد وهتستمتع جدا بالمحتوى، وكمان هتحسن الإنجلش جدا من كثرة الاستماع وقراءة الكلام قدامك.

.

6. لو بتكسل تقرأ كتب ولكن عايز تستفيد وتثقف نفسك وتعرف الزتونة، يبقى حلك المثالي:

إما إنك تعدي على محل بتاع مجلات وجرايد قريب وتشتري منه مجلة ناشونال جيوغرافيك التحفة، صور رائعة ومعلومات موجزة مبسطة هتخليك update ديما أو على دراية بما وصلت إليه التكنولوجيا والأبحاث العلمية وما يحدث في الوسط العلمي والتكنولوجي برا.

أو تفتح ع النت المجلات العلمية الشهيرة زي: nature، وscientific amercian، وscience، وغيرهم.

أو تدمن مواقع المقالات دي: http://bit.ly/2tyeuum

أو تشوف وثائقي كل يوم من الموقع الكنز ده (علوم العرب) مثلا أو غيره ع اليوتيوب.

.

7. لو الجو العام في المواصلات هادي ويقدر يساعدك، فـ يكفيك تحمل بس أبليكيشن (edx) أو (coursera) للكورسات الأجنبية وأبليكيشن (إدراك) و (رواق) للعربية، وتخلص عشرات الكورسات في أي مجال تحبه وإنت قاعد، لو معاك نت، أو حاول تحمل الكورس بأي طريقة قبل ما تنزل وعيش.

.

8. تحمل كام فيديو علمي ممتع ع اليوتيوب من القنوات الرائعة دي:http://bit.ly/2xx3fp1

أو تحمل وتسمع محاضرات تثقيفية في الدين

في شيخ العمود من هنا: http://bit.ly/2yoRgsM أو الساوند كلاود.

أو مقاطع الراائع سعيد الكملي لتلقى مزيج بين علوم الدين والأدب والتراجم وروعة الشعر، من هنا: http://bit.ly/2y3KQTY 

أو خواطر الشعراوي من هنا: http://bit.ly/2ypiNdV

وتقدر تنسخ لينك أي فيديو عايز تسمعه وتحطه في الموقع ده:http://bit.ly/2dF5BcQ وهيحولهولك في ثواني لفايل mp3 تسمعه طول الطريق.

.

9. ممكن تخطط يومك أو أسبوعك، تنظم جدول محاضراتك ومواعيد مذاكرتك أو شغلك أو كورساتك والتاسكات المطلوبة منك ... وتحط التودو ليست بتاعتك عن طريق التطبيق الرائع (Any.do)، وترد على إيميلاتك ... وترد على رسائل صحابك، وتبعت رسايل للناس اللي بقالك فترة مسالتش عليهم .. وتقدر تراجع المحاضرات الي خدتها مراجعة سريعة وتحاول تلخيصها والمعلومات لسه طازة في دماغك بأقل الكلمات الممكنة في زتونة صغيرة تثبتها أكتر في دماغك، وتحمل تطبيق (Notebooks) وتكتب كل الي إنت عايزه وأي خواطر تيجي في دماغك جواه في الحفظ والصون.

.

10. تقدر تحمل من جوجل بلاي ألعاب ذهنية مفيدة وممتعة تقتل الزهق والممل ده زي الشطررنج مثلا أو السدوكو أو حل ألغاز أو الكلمات المتقاطعة من أي جرنال، هتنمي عقلك وتفكيرك وسرعة بديهتك وقوة ملاحظتك بشكل لا تتخيله، أو جرب الماندلا للي بيحب التلوين والاسترخاء واروقان، وورينا فنك وابداعك، من خلال تطبيق (صفحات تلوين ماندالا).

.

11. تقدر تفتح السوشال ميديا تاخد جولة عند الناس الي بتستفيد من كتاباتهم، ودول ناس ممكن تستفاد جدا من كتاباتهم: http://bit.ly/2hgXis1 

أو تاخد جولة شوية في موقع Quora وتشوف الاجابات على الاسئلة هناك في المواضيع الي تهمك، أو ترد على اسئلة لو إنت عارف اجاباتها.

.

12. ممكن كل يوم قبل ما تركب تشتري ملبس أو حبة بلالين، ولو لقيت طفل صغير راكب جنبك تقعد تلعب معاه وتحاول تفرحه وتنفخله بلونة، حال تنقي روحك بالتعامل مع البراءة الجميلة دي، واقعد جنب الشباك -ده لو عرفت تقعد- وتأمل في السما والطيور والعمارات والشجر وزحمة البشر الي بتجري ورا أكل عيشها وتدعي لكل واحد بظهر الغيب الدعوة الي شايفها تناسبه.

وحفاظا على صحتك النفسية.

13. لا تدخل فى جدال إطلاقاً في موضوعين تحديداً (السياسة والدين).. احتفظ برأيك السياسي لنفسك ولا تناقش فيه إلا أصدقاءك المُقرّبين، وانأى بنفسك عن المشاركة في أي صراعات سياسية لن تحقق أي شيء من وراءها في حياتك أو بعد مماتك.. ومارس دينك أو مذهبك بنفسك دون الدخول فى صراعات أو مناظرات أو تحقيقات مع أهل الأديان والمذاهب الأخرى.. لكل دينه ورأيه .. أمم، ولا الكورة بردو، بص، ما تشغلش بالك ولا تشوّش عقلك ولا تشتت تركيزك أبدًا في خوض جدالات في قضايا عامة لن تسمن ولن تغني من جوع!

وإوعى تركز في نقاشاتهم بردو لأن غالبًا هيجيلك شلل نصفي، أو لا قدر الله تسمع أغاني سائقي الميكروباصات، حاول تعلي صوت الهيد فون ع الآخر منعا لتسلل أي صوت من البيئة المحيطة إليك.

وع الهامش كده، لو متأخر على ميعاد بلاش تبص كل شوية ف الساعة .. أصل ملهاش لازمة، لا السواق هيمشي أسرع ولا الطريق هيفتح بمعجزة، هتتوتر أكتر وتتخنق طول السكة، وبلاش تكدب على صاحبك وتقوله أنا أهو خلاص قربت وإنت لسه راكب، خليك صريح لأنك لما تقوله الحقيقة هتحس إنك مرتاح أكتر وهو هيعمل حسابه.

فـ طز في أي حاجة المهم صحتك يا صديقي.

جعل الله معاناتنا في شوارع مصر شفيعة لنا يوم القيامة.

اقعدوا بالعافية ")

نقلا عن
Ahmad Abd El-Monsef