البوست دا شخصي و هيبقى فيه كلام مش هيعجب ناس كتير..
لو انت طري او انتي طرية.. و مشاعرك بتتخدش بسهولة يبقى متكملش قرايه!
الحمدلله و بفضله اتجوزت تاني من اجنبيه و مش عربيه..
مش مهم ندخل في تفاصيل مأساة الجوازة الاولانية من المصرية. بس البوست دا للي بيفكر يتجوز اول مرة او ربنا نجاه من المصرية الأولى و بيفكر يتجوز تاني..او حتى لو حابب تطلقها و تتجوز تاني 🤭😅 (بهزر🤣)
انا اتجوزت من غير نيش سعادتك 😂😂
اه و الله زمبئولك!
مفيش اطقم صيني! ولا نحاس!
مكتبتش قايمه و ربط رقبتي بدين ليوم القيامة!
مجبتش مهر ب ستشميت الف جنيه!
مؤخرها كتبته ١٠٠ جنيه بس لأن المأذون اصر اني مدفعش ربع جنيه زي مكنت انا عايز لان الدولة بتاخد ٢٠٪ من قيمة المؤخر!!
مكتبتش على نفسي وصولات امانه ولا استلفت من طوب الأرض!
و ممضتش على اي كمبيالات تلاجه و غساله بالتقسيط!
ابوها (نسيبله بوست لوحده بعدين) عمره مقالي "احنا بنشتري راجل" و بعديها لزم "بس مينفعش تجيبلها اقل من بنت خالتها"!
معملتش فرح في قاعة الملكة ملوش ستين لزمة و صرفت دم قلبي عشان أنفذ تقليد اجتماعي احمق!
وخد دي بقى.. الكبيره..
مشترش شقة ولا دفعت قسط مسكن شباب في اي مدينة جديدة!
مراتي اسلمت و لله الحمد و المنة (ادعولها و ادعولي بالثبات) و خدت فيها ثواب احتسبه عندالله!
تكلفة كل ورقنا شاكب راكب بتاع ١٠٠٠ جنيه!
اه سعادتك!
ممكن تتجوز بالحلال و تعف نفسك ب ١٠٠٠ جنيه!
مراتي مطلبتش مني غير اني احبها و اخد بالي منها!
ال trick فين بقى؟
اننا لازم نتشارك في كل حاجه!
لو هنأجر شقة، كل واحد يدفع النص. واحد يطبخ و التاني يغسل الأطباق. واحد يشتري الطلبات من السوبرماركت و التاني يدفع فواتير الكهربا و المايه... و هكذا!
بذمتكم.. فيه احلى من كده؟؟؟
ليه البوست دا؟
عشان اقولك فووووووووووووق!
فوق و متضيعش نفسك في عادات و تقاليد باليه ليس من الدين او العقل فيها من شيء!!
فوق و انت أولى بالقرش دا تشتغل بيه و توسع على نفسك و مراتك و عيالك!
متقبلش بالأمر الواقع و تبدأحياتك بديون متلتله و تقعد تلف حوالين نفسك عشان تدفع!
و نصيحة اخيرة لوجه الله.. موت اعزب و متتجوزش الا اجنبية!
تعليقات: 0