ازي تكتب خطة بحثك كباحث درسات عليا ؟


السلام عليكم  
ازاي تكتب خطة بحثك ؟ Research Proposal
في البداية لازم تعرف يعني ايه رسالة علمية ؟ 
الرسالة العلمية دي هي عباره عن مجموعه من الوثائق اللي بتحتوي ع مجموعة من الأبحاث , بحيث اني اثبت في الرسالة دي مشكلة وطريقة لحل المشكلة دي واكتبها بصوره منظمة في اطار المعطيات والنظريات والفروض والادله والبراهين .
طيب دلوقتي لازم تسأل نفسك كام سؤال ؟؟
1- WHY ؟ انا ليه هعمل الرسالة دي ؟
2- WHAT ؟ ايه هو الهدف واهمية البحث بتاعي ده !
3- WHERE ؟ لازم احدد المكان اللي هعمل عليه موضوع بحثي ده .
4- WHEN ؟ لازم تحدد الوقت اللي هتشتغل فيه البحث 
5- HOW ؟ ازاي انا هعرض موضوعي البحثي ده

بعد ما تسأل نفسك وتجاوب ع الأسئلة دي .. 
هقولك تكتب خطة بحثك ازاي ؟ واي اهم الخطوات اللي بتتبعها 
خطوات كتابه خطة البحث ..
1- اختيار عنوان للبحث .
2- كتابة مقدمة .
3- استعراض الدراسات السابقة.
4- تحديد الحدود الزمنية والموضوعية .
5- منهجيّة البحث.
6- الاستنتاجات .
7- المراجع.

هنبدأ نتكلم بالتفصيل ع كل نقطة .. 
1- اختيار عنوان للبحث .
ازاي تختار عنوان لرسالتك ؟ هل ليها شروط معينه ؟ 
طبعا دي تساؤلات دايما بتسألها لنفسك ..
اختيارك للعنوان من اهم الامور اللي لازم تأخذ بالك منها ! لو تلاحظ اي ابحاث او رسائل منشوره من اول نظره للعنوان بتفهم المضمون ايه ؟ 
ده يدل انك لازم تختار عنوان واضح وسهل ومختصر يعني ف ناس تقولك حوالي 10-15 كلمه , وف مشرفين بيحسبوها بطريقه تانيه يقولك مايزدش عن سطرين يكون أفضل للقارئ .
وكمان لازم تأخذ بالك ان العنوان مايكنش فيه مواضيع كثيره ده بيخلي القارئ مابيركزش في المحتوي وبتكون نتائجة سلبية , ولكن تكون محدد موضوع معين يدل على انك هتتعمق ف التفاصيل بعد كدا .

2- كتابة مقدمة .
في كذا حاجة لازم توضحها في المقدمة بتعتك وهي 
• مشكلة البحث الرئيسية.
• موضوع الدراسة المتعلق بالمشكلة دي .
• وايه الطريق اللي هتحل بيها مشكلتك ؟
• وأهمية البحث ده .

كتابتك في الأمور اللي فوق دي لازم تكون مشّوقة يعني تخلي مشرفك يتشد للموضوع ويحس بأهميتة ! 
بتكتبها ازاي ؟ بتكون مجموعه من الفقرات في تفاصيل تمهد موضوع الدراسة , وبتذكر في الأخير ايه الجهات اللي ممكن تسفيد بالبحث بتاعك ده .

3- استعراض الدراسات السابقة .
هنا حضرتك بتدور علي رسائل وابحاث وكتب ومقالات واي حاجه ممكن تلاقي معلومه عن بحثك , وتلخصها وتحللها ومن خلال عرضك ليها بتكون موضح نقاط القوه والقيود في الابحاث السابقة .
ولازم تأخذ ف الاعتبارالتالي :-

• التركيز : انك تكتب المراجع والابحاث بصوره دقيقة , وانك تركز علي النقط اللي تهمك في البحث.
• البنية : دي بتنظم فيها الدراسات السابقه تأخذ في الاعتبار ترتيب السنوات وبتنظم فيها اوجه التشابه والاختلاف للتسهيل بدل ماتكتب كل نقطه عاور تشرحها منفصله في الخطة بتعتك .
• مواصفات الكُلية : كل كُليه ليها نظامها وبتقترح حاجات معينه في خطوات بحثك فـ انت لازم ترجع لمشرفك وتسأله قبل ماتكتب اي حاجة .
4- تحديد الحدود الزمنية والموضوعية .
هنا بقصد بيها شغلك العملي هتعمله فين ؟ وع ايه بالضبط ؟ 
يعني انا مثلا كان شغلي عن المياه , حددت المنطقة اللي هجيب منها المياه , والفتره الزمنية اللي هشتغل فيها يعني تشوف مثلا هتحتاج توقيت معين ولا ممكن ف اي وقت .. كل التفاصيل دي بتكتبها وبتوضحها في الخطه بتعتك 😉

5- منهجيّة البحث.
هنا بتوضح خطوات بحثك بشكل مفصل , ولو لقيت نفسك هتسخدم طريقة متطوره عن الابحاث المنشوره هتكتبها وتكتب ايه العلاقه بنها وبين البحث الفلاني , ولو لقيت ف طريقك رسم بياني او اي ادوات توضحيه ماتبخلش ع خطتك وحطها 😀

6- الاستنتاجات .
هنا بتوضح كل اللي استنتجته واستوعبته من خلال اللي فات ده , وبتأكد على اهميه بحثك وانك هتقدر تحل المشكلة اللي شوفتها دي .



6- المراجع .

طالما كتبت الابحاث السابقة يبقى لازم توثقها بالمرجع بتاع البحث وتكتبها بصوره صحيحه حسب المتبع لطريقه المراجع في الكلية بتعتك .

تم تجميع الماده العلمية من بعض المواقع للأمانه , وتم دعمها ببعض المعلومات حسب ماتوصلت اليه من دراستي ..
اذا استفدت ولو حاجه بسيطة من المنشور.. 
لا تنسوني انا ووالديا من صالح الدعاء 
منقول من enas ali
من جروب الدراسات العليا بالجامعات المصرية

جديد قسم : الدراسات العليا