دروس فوريو droos4u دروس فوريو droos4u
تعلم الأنجليزية

آخر الأخبار

تعلم الأنجليزية
الربح
جاري التحميل ...
الربح

ازي اتعلم اي لغة في اسرع وقت وبشكل صحيح



طيب ده شاب اسمه محمد عنده حوالي 26 سنه كان استضافه البني آدم اللي بعشقه اللي اسمه الشقيري ده في حلقه من حلقاته لانه كان بيتقن حوالي 17 لغه !! 
امبارح انا كنت اعد قدام الشاب ده بحضرله سيشن بيشرح فيه ازاي اتعلم اللغات دي كلها في الوقت ده و قال حاجات كتير فادتني جدا بصراحه فانا حاولت الخصها في كام نقطه و اكتبها  
1- احفظ جمل مش كلمات . قال من الغلطات الفادحه في نظام تعليم اللغات في مصر هو ان الطفل بيدخل الفصل بيترص قدامه قائمه كلمات المفروض يحفظها و يعد يحفظ عشان يسمع و بعدين ينسي و ده غلط ، المفروض الواحد لو قابلته كلمه جديده لازم يتعامل معاها كجمله لازم يعني تحطها في قالب عشان متدلقش من مخك 

2- غرق البيئه المحيطه بيك باللغه . يعني لو هتتعلم انجلش يبقي حاول تغير كل حاجه حواليك للانجلش . التلفزيون الموبايل الفيس ، الاخبار ، الراديو ، اسمع اغاني انجلش ، و ضيف ناس عندك ع الفيس من بلاد اجنبيه و ارغي ، اقرا كتب بالانجلش ، الافلام اللي بتشوفها حاول تخلي ترجمتها بالانجلش و وقف الفيلم و حاول تقلد المشاهد اللي بتتقال و تنطق الجمل زيهم ، اتكلم مع صحابك حتي لو ساعتين كل يوم بالانجلش ، اكتب اي حاجه تيجي في دماغك بالانجلش ، خلي عينك تتعود تشوف حروف انجلش و ودانك تتعود تسمعها وايديك تعود تكتبها و لسانك يتعود ينطقها ، ده اللي خلي الاطفال تنطق اللغه من غير ما تدرسها و ده اللي كان بيعمله . 

3- متتكسفش اما تنطقها او تتكلمها. قال انه في امريكان اما كان بينطقوا كلمات غلط كان عادي الناس بتصلحها بكل بساطه انما عندنا لو قولنا كلمه غلط يتريقوا علينا و المصيبه لو قولنا كلمه بنطقها الصح يتريقوا علينا بردو ! فخلي عندك ثقه و اتكلم مع السياح مع صحابك مع اي حد و نفض للناس  

4- اي لغه ديما بتبقي مرنه . متفكرش في الجراااامر كتير اما تيجي تتكلم و قال امثله عن كلمات كتير بينطقها الامريكان و ملهاش اي علاقه بالانجلش زي ما احنا بننطق كلمات كتير ملهاش علاقه بالعربي فهما كده بردو و اي لغه كده فحاول تاخد الموضوع ببساطه مش لو غلطت في اسبيلنج تتعقد او غلطت في جرامر تتكسف . 

5- خلي عندك روتين يومي . روتين لازم تنفذه كل يوم مثلا هتتكلم مع صحبك ساعه او تسمع فيديو انجلش لمده ربع ساعه و تحاول تفهمه و تعرف الكلمات الجديده و تحطها في جمل زي ما قولنا و تستخدمها متركنهاش . 

6- متبداش لغتين ع التوازي . و دي يعتبر اهم نقطه فادتني لاني كنت بفكر اعمل كده .. يعني مش الاسبوع او الشهر ده هركز ع الانجلش و الاسبوع الللي بعديه فرنساوي قال لا ده غلط حاول تركز علي لغه واحده بسسس و تغرق حياتك في اللغه دي لحد ما تتشبعها و ممكن بعد ما توصل للمستوي المتوسط في اللغه تبدا في basics لغه جديده . 

7- استغل الفرص . جالك فرصه تسافر متفكرش مرتين  جارك بيتكلم لغه معينه اتصاحب عليه صحبك حسيت الاكسنت بتاعه حلو حاول تتكلم معاه كتير ، روحت مكان في سياح حاول تتكلم معاهم متتكسفش ، لاقيت بيدج اجنبيه حاول تدخل تعمل كومنتات و تشارك في اي نقاش فيها و يا سلام لو بعت ادد و اتكلمت مع حد فيهم شات ( انا عملت كده  ) 

8- الكورسات دي fake . مش كورس اللي هيخيليك تتكلم اي لغه مهما كان الكورس معتمد من اي حته ... الكلام اللي فوق ده اللي هيخليك تتكلمها لبلب بس لو انت عايز و تعبت و حطيت الموضوع في دماغك  
بصراحه انا فكرت اكتب بوست مليان لينكات مواقع و كورسات انجلش من اللي مسيفهم عندي و بتاع بس حسيت ان الكلام ده مفيد 
اكتر اهم من البوستات دي اللي مش فالحين غير اننا نعملها bookmark وبس 


نقلا عن
Ahmad Abd El-Monsef

التعليقات



إذا أعجبك محتوى مدونتنا نتمنى البقاء على تواصل دائم ، فقط قم بإدخال بريدك الإلكتروني للإشتراك في بريد المدونة السريع ليصلك جديد المدونة أولاً بأول ، كما يمكنك إرسال رساله بالضغط على الزر المجاور ...

إتصل بنا

جميع الحقوق محفوظة

دروس فوريو droos4u

2016