دروس فوريو droos4u دروس فوريو droos4u
تعلم الأنجليزية

آخر الأخبار

تعلم الأنجليزية
الربح
جاري التحميل ...
الربح

10 أفلام لو متفرجتش عليهم يبقي فاتك عمرك كله مش نصه بس :D


 10 أفلام لو متفرجتش عليهم يبقي فاتك عمرك كله مش نصه بس :D



مبدئيا القايمه دي مفيهاش افلام للسهره الجميله و تجيب فشار و لب و تتفرج و تقول جميل و خلاص  الافلام دي علي قد ما هي تحفه لكن كمان بتوصل رساله و ممكن تغير حاجات كتيــر في حياتك و تفكيرك و نظرتك لكل حاجه حواليك مينفعش تبدا السنه الجديده و انت مشوفتهمش ! و الله العظيم ما ينفع  
10- ( a christmas carol ) 
هو انا أول مره في حياتي أرشح فيلم إنميشن لأي حد لاني اصلا مبشوفش انيميشن كتير هما اتنين تلاته في حياتي ، وانا كنت بقرأ مقال لكاتب كده محل ثقة عندي عن حاجات لو عملتها هتغير حياتك لاقيته مرشح الفيلم ده و بيقول مفيش حد شافه غير اما حياته اتغيرت بعديه و كلام كتير كده حسيته أوفر .. بس اما شوفته لاقيت الكاتب مكنش أوفر ولا حاجه ! 
9- ( Into The wild ) 
للناس اللي زهقت من الروتين ، من الايام اللي شبه بعضها ، من تحكمات اهلها ، الناس اللي نفسها تهرب من الناس كلها و تعيش حياه تانيه ، تعيش الحياه اللي بتتخيلها قبل النوم ، تعمل حاجات مجنونه من غير ما حد يقولها عيب و ميصحش  تعيش كل يوم بطوله و عرضه ، تجرب كل اللي نفسها فيه بعفويه و تلقائيه .. اليكم هذا الفيلم الاكثر من رائع ^^ 
8- ( Taare zameen par ) 
من الافلام اللي لازم تدرس والله .. اما تلاقي الناس كلها شايفينك فاشل و مش نافع ، اما يحسسوك انك غبي ، اما تلاقي كل اللي حواليك شاطر بس انه ينتقضك ( بالضاض ) و بس ، اما تحسي ان ابنك مش نافع ف المدرسه ، اما تفشل في حاجه و الدنيا تسود في عينك ، والله نفسي كل أب و أم و مدرس يشوفوه . 
7- ( About time ) 
ديما اما بيحصلك موقف محرج ، موقف ضايقك بس سكت و بعدين ندمت و قولت يارتني كنت قولت بلاوي ، موقف قلقك و خوفك .. تخيل لو كنت تقدر ترجع بالزمن و تصلحه ؟ تخيل لو تقدر ترجع و تعيش المواقف دي بالشكل اللي كنت تتمناه ، كان حياتك هتبقي شكلها ازاي  
فيلم في قمه المتعه و في نفس الوقت هيوصلك احاسيس جميله جدااا  
6- ( the theory of everything ) 
اما يكون جواك طموح كبير اوووي و طاقه هائله و بكلمه واحده من دكتور تهدملك كل طموحك ده ، تجبلك يأس ، تهدك و في الوقت اللي كنت فاكر انك مش هتقوم تاني يظهرلك حد في حياتك يسندك و يقومك و يقولك انا جنبك و مش هسيبك مهما حصل ، الفيلم ده عن قصه حقيقيه لعالم الفلك المشهور (ستيفن هوكينج) و روعه الفيلم انه بياكد جمله (وراء كل رجل عظيم امرأه ) 
5- ( A beautiful mind ) 
بصراحه من الافلام الروعه اللي متتفوتش بيتكلم عن قصه حقيقيه لعالم رياضيات خد جايزه نوبل في الاقتصاد ( جون فوربس ) و رغم عبقريته الفزه الي انه كان بيتهيأله حاجات .. و كان يعد يتكلم مع شخصيات وهميه و حاجات كتير مثيره جداااا حصلتله بسبب الموضوع ده و لكن في واحده مسابتهوش و فضلت معاه لحد ما اثبت نظرياته و فضلت معاه لحد ما قد يتعالج الي حد ما و تتحسن حالته و ده تاني فيلم تكمن روعته في تاكيده لنفس الجمله .  
4- ( The Shawshank Redemption ) 
اعتقد مفيش حد من صحابي و من قرايبي و من اي جنس مخلوق شاف الفيلم ده و مقلش انه من افضل الافلام اللي شافها علي الاطلاق  
مهما كان اللي حواليك بتقولك مستحيل بس انت لو حطيت الحاجه دي ف دماغك و مخمخت و ركزت في التفاصيل و اشتغلت بذكاء مش بجهد هتوصل و الناس اللي قالتلك مستحيل هتشوفهم منبهرين و متنحين مش اكتر  
3- ( Benim Dünyam ) 
ده الفيلم التركي الوحيد اللي شوفته .. الفيلم ده لو كنت كتبت البوست كله عليه كلامي مش هيكفي والله  روعه تمثيل بيرين في تجسيد قصه الاديبه العظيمه ( هيلين كيلر ) تخليك بعد ما تشوفه تقف و تسقف .. فيلم مخلانيش ادمع لا ، خلاني ابكي !! واحده كفيفه و صماء و بكماء . عايز حاجه تاني ؟؟ و لكن مولولتش و مستسلمتش للظروف و كافحت لحد ما بقت من اشهر الادباء و المحاضرين ، فيلم مفيش بعده )) 
2- ( the pursuit of happyness ) 
انا اعدت نص ساعه بفكر هكتب ايه عنه و معرفتش !!!! 
فيلم لازم يسيب بصمه في حياتك ، لازم يغير جواك حاجه او حاجاااات ، لازم يخليك تحس بحاجات كتير اوووي مكنتش حاسسها لازم يخليك تقف مع نفسك وقفه جامده و تعمل زوم أوت لحياتك و تبص عليها من برا .. والله اقل ما يقال عنه تحفه ، فيلم تاريخي ، ابدع فيه و عن جداره ويل سميث ، مش هزهق منه لو شوفته 1000 مره
1- ( 3 idiots ) 
الفيلم ده هو ملهمي اقسم بالله ، كفايه ان حلم حياتي يتلخص فـ اخر مشهد في الفيلم و مش هوضح اكتر  مش فاكر انا شوفته كام مره و مش بشبع منه ، فيلم لازم يتدرس في كل المدارس و الجامعات ، لازم كل الطلبه في كل الاعمار تشوفه لااااااازم ، فيلم اتجمع فيه كل عناصر العمل الفني اللي ... والله ما عارف اقول ايه !! بجد مش عارف اوصفه ازاي ! لو مشوفتوش يبقي بجد فاتك كتير اوووووووي .


نقلا عن
                                                                         Ahmad Abd El-Monsef

التعليقات



إذا أعجبك محتوى مدونتنا نتمنى البقاء على تواصل دائم ، فقط قم بإدخال بريدك الإلكتروني للإشتراك في بريد المدونة السريع ليصلك جديد المدونة أولاً بأول ، كما يمكنك إرسال رساله بالضغط على الزر المجاور ...

إتصل بنا

جميع الحقوق محفوظة

دروس فوريو droos4u

2016